Home

Yahooએ રૂ.5500 કરોડમાં 26 વર્ષના યુવકની Tumblr ખરીદી, પરંતુ કેમ?

20 મે, 2013ના રોજ Yahoo – Tumblrની ડીલે ઇન્ટરનેટ જગતને આશ્ચર્યચકિત કરી દીધું. 1.1 અબજ ડોલરની મસમોટી ઓફર દ્વારા યાહૂએ આખરે Tumblrને પોતાના પોકેટમાં નાંખવાનું મિશન પાર પડી દીધું.

જો કે આજનો ઇન્ટરનેટ વધુને વધુ સોશ્યલ મિડીયા પર ટાઈમ વીતાવતો થયો છે ત્યારે ઇન્ટરનેટ જગતમાં ફેસબુક, ગૂગલ અને ટ્વિટર જેવી દિગ્ગજ વેબસાટ સામે ટકી રહેવા માટે યાહૂ પાસે ઇમેલ સર્વિસ સિવાય એવું કોઈ મોટું હથિયાર દેખાતું ન હતું. કદાચ, એટલે જ યાહૂની CEO મેરિસા માયર જે જુલાઈ 16, 2012ના રોજ યાહૂમાં જોડાઈ છે તે આવી ડીલ પાર પાડીને યાહૂને કોમ્પિટિટર સાથે ટક્કર લેવા માટે મજબૂત કરવાના પ્રયાસો કરી રહી છે. કારણ કે ફેસબુક અને ટ્વિટર જેવી સોશ્યલ મિડીયા અને માઈક્રોબ્લોગિંગ સાઈટની ભરપૂર લોકપ્રિયતાની સામે પણ Tumblrએ પોતાનો એક વિશાળ ચાહક વર્ગ મેળવ્યો છે તેમ જ સાચવી રાખ્યો છે. જે તેનો આકર્ષક લૂક અને સાઈટની સરળતાને આભારી છે.

યાહૂની અત્યાર સુધીની આશરે 80 જેટલી કંપનીઓની ખરીદીમાં આ ડીલની કિંમતનો ક્રમ ચોથો છે.

Yahoo જેવી બિગ કંપનીએ Tumblrને 5500 કરોડ રૂપિયાની ઓફર કરીને ખરીદી લીધી છે ત્યારે આવો જોઈએ કે Tumblr ખરેખર આટલી બિગ અમાઉન્ટને લાયક છે કે નહીં. અને જો છે તો યાહૂને શું ફાયદો થશે? લેટ્સ ચેક આઉટ ધ ડીલ

Tumblr પર ઉડતી નજરસ્થાપના : ફેબ્રુઆરી 2007
ઇન્ડસ્ટ્રી : ઇન્ટરનેટ, વેબસાઈટ
હેડક્વાટર : ન્યૂ યોર્ક સિટી, અમેરિકા
ફાઉન્ડર : ડેવિડ કાર્પ, 26 વર્ષ
કમર્ચારીઓ : 175 (મે 2013 સુધી)
ગ્લોબલ વેબસાઈટ રેન્ક : 32(એલેક્સા રેન્કિંગ પ્રમાણે)
રેવન્યુ : 2012માં 13 મિલ્યન ડોલર (રૂ.65 કરોડ), જે 2013માં 100 મિલ્યન ડોલર થવાની આશા
પેજવ્યૂઝ : 45 કરોડ રોજના
Yahoo પર ઉડતી નજરસ્થાપના : માર્ચ 1, 1997
ફાઉન્ડર્સ : જેરી યાંગ અને ડેવિડ ફીલો
હેડક્વાટર : કેલિફોર્નિયા, અમેરિકા
કર્મચારીઓ : 11500 (વર્ષ 2013)
ગ્લોબલ વેબસાઈટ રેન્ક :  4 (એલેક્સા રેન્કિંગ પ્રમાણે)
રેવન્યુ : 2012માં 4.98 અબજ ડોલર (આશરે રૂ.250 અબજ)

Tumblr શું છે?

જો કે ભારતમાં એટલી લોકપ્રિયતા ન મેળવનારી આ વેબસાઈટનું વર્ણન સરળ અને સમજણ પડે તે રીતે કરવું હોય તો Tumblr (www.tumblr.com) ફેસબુક અને ટ્વિટરનું મિશ્ર સ્વરૂપ છે. એટલે કે ટેકનિકલી વાત કરીએ તો Tumblr એક માઈક્રોબ્લોગિંગ (ટ્વિટર) અને સોશ્યલ મિડિયા (ફેસબુક) વેબસાઈટ છે જે યુઝરને મલ્ટિમિડીયા કન્ટેન્ટ પોસ્ટ કરવા માટે બ્લોગનું શોર્ટ ફોર્મ પૂરૂં પાડે છે. યુઝર અન્યના બ્લોગ ફોલો કરી શકે છે તેમ જ પોતાનો બ્લોગ પ્રાઈવેટ પણ રાખી શકે છે. Tumblr ખાસ તેની સરળતા, જોઈતું હોય તેવું હાજર કન્ટેન્ટ અને રિચ લૂકના કારણે યુઝર્સને તેનો સાથ છોડવો ગમતો નથી.

Tumblrમાં તમે તમારા કોઈ પણ શોખ, લેખન કે કલેક્શનને દુનિયા સમક્ષ પ્રેઝન્ટ કરવા માટે પ્લેટફોર્મ મેળવી શકો છે. ટેક્સ્ટ, ઇમેજીસ, વિડીયો, ઓડિયો, લિંક્સ કે ક્વોટ્સ વગેરે જેવી માહિતી સામગ્રીને તમે tumblelog (શોર્ટ બ્લોગ) સ્વરૂપે ઇન્ટરનેટ પર મૂકી શકો છો.

વેબસાઈટમાં ફેસબુકની જેમ તમારી બ્રાન્ડ, બિઝનેસ અને સેલિબ્રિટી પેજ બનાવી શકાય છે. ટીનેજ યુઝર્સની ફવેરિટ આ સાઈટનો ઉપયોગ ઇન્ટરનેશનલ મ્યુઝિશયન્સ અને બેન્ડ્સ ફેન્સ સાથે કનેક્ટ રહેવા માટે કરતાં હોય છે જેમાં લેડી ગાગા (જાણીતી પોપ સિંગર) અને જ્હોન માયર (મ્યુઝિશ્યન, કમ્પોઝર અને સિંગર)નો સમાવેશ પણ થાય છે.

Tumblrનો ઇતિહાસ

Tumblrનો ઇતિહાસ છે એમ કહેવાય જ નહીં કારણકે ઇતિહાસની વાત કરીએ એટલે ઘણાં વર્ષો જૂની વાત કહેવાય. જ્યારે આ વેબસાઈટનો જન્મ તો થોડાં વર્ષો પહેલાં એટલે કે ફેબ્રુઆરી 2007માં જ થયો છે. ટૂંક સમયમાં સફળતા પ્રાપ્ત કરવામાં ફેસબુક અને ટ્વિટરની જેમ જ Tumblr પણ ટોપ ટેનની હરોળમાં છે. Tumblrના 26 વર્ષના માલિક અને ફાઉન્ડર ડેવિડ કાર્પને શોર્ટ ફોર્મ બ્લોગિંગમાં ઘણો રસ હતો અને તે પોતાનો આવો જ એક વેબસાઈટ પ્રોજેક્ટ શરૂ કરવાના મૂડમાં હતો જે તેણે માર્કો એરમેન્ટ નામના ડેવલપર સાથે મળીને પાર પાડ્યો. લોન્ચિંગ બાદ ફક્ત 2 સપ્તાહ જેટલાં સમયમાં જ 75000 યુઝર્સે સાઈટ પર સમય ગુજારવા લાગ્યા હતાં.

Yahooની Tumblr ખરીદવાની ચાહત કેમ?

યાહૂની Tumblrને 1.1 અબજ ડોલરની ઓફરે બિઝનેસ જગતની સાથે સાથે કેટલાંય લોકોના મનમાં એક પ્રશ્ન ચોક્કસપણે રમતો મૂકી દીધો હતો કે આખરે યાહૂએ Tumblrને ખરીદી શું કામ? સો વેલ, આ વેબસાઈટની મૂલ્યતા પર શંકા કરતા પહેલા જાણી લો કે ઇન્ટરનેટ જગતમાં Tumblr ભારે લોકપ્રિયતાની સાથે ગ્લોબલી 32મા નંબરે છે જેનો ચાહકવર્ગની સંખ્યા કરોડોમાં છે. Tumblr પર મે 19, 2013 સુધી 10.8 કરોડ બ્લોગ લોકોનું મનોરંજન પૂરૂ પાડી રહ્યું છે જ્યારે 50.8 અબજ જેટલી પોસ્ટ્સ તેની લોકપ્રિયતાનો જબરદસ્ત પુરાવો આપે છે. જો હજુ પણ તમારી શંકા દૂર ન થતી હોય તો જાણી લો કે Tumblr પર દરરોજ આશરે દુનિયાભરમાંથી 1.3 કરોડથી પણ વધુ લોકો ધામા નાંખે છે જેનાથી રોજના 45 કરોડ જેટલાં પેજવ્યૂઝ થાય છે.

જો કે મૂળ વાત કરીએ તો યાહૂનો Tumblr ખરીદવાનો મુખ્ય હેતુ ઇન્ટરનેટ પર ટકી રહેવા સોશ્યલ મિડીયા અને માઈક્રોબ્લોગિંગ સર્વિસને પોતાની યશકલગીમાં ઉમેરવા માટેનો છે. આ ઉપરાંત આટલો મોટો ચાહકવર્ગ અને પેજવ્યૂઝના કારણે એડવર્ટાઈમેન્ટ દ્વારા તગડી રેવન્યુ કમાવવાનો પણ એક હેતુ હોઈ શકે. તમને જાણીને નવાઈ થશે 18-24 (30%) એજ ગ્રુપમાં સૌથી વધુ લોકપ્રિય રહેનારી આ સાઈટ પુરુષો કરતાં સ્ત્રીઓમાં વધારે ચાહના ધરાવે છે. જેથી એડવર્ટાઈઝમેન્ટમાં પણ ફિમેલ ગ્રુપને ટાર્ગેટ કરવા માટે આ વેબસાઈટ આશીર્વાદરૂપ બની રહે છે.

કોણ છે ડેવિડ કાર્પ?

Tumblr વેબસાઈટનો માલિક ડેવિડ કાર્પ ફક્ત 26 વર્ષનો છે અને તે પણ હાઈ સ્કૂલ ડ્રોપઆઉટ

જુલાઈ 6, 1986ના રોજ જન્મેલો આ અમેરિકન છોકરો Tumblrનો ફાઉન્ડર તેમ જ CEO છે. તેના પિતા માઈકલ કાર્પ જે એક ફિલ્મ અને ટીવી મ્યુઝિક કમ્પોઝર જ્યારે માતા ટીચર છે. ડેવિડ ફક્ત 8 ધોરણ સુધી જ ભણ્યો હતો અને ત્યાર બાદ તેને ભણવામાંથી રસ ઊડી ગયો હતો. તેણે 11 વર્ષની ઉંમરે જ HTML (hyper text markup language – વેબસાઈટ બનાવવા માટેની કોડ લેંગ્વેજ) શીખવાનું શરૂ કરી દીધાં બાદ થોડાં સમયમાં જ ક્લાયન્ટ્સ માટે વેબસાઈટ બનાવવાનું શરૂ કરી દીધું હતું. 20 વર્ષની ઉંમરે આ વેબસાઈટ શરૂ કરી હતી તે પહેલાં ડેવિડ પોતાની સોફ્ટવેર કન્સલ્ટીંગ કંપની ચલાવતો હતો. ત્યાર બાદ દિમાગની બત્તી ઝબૂકી અને શોર્ટ બ્લોગિંગના રસે Tumblrને જન્મ આપ્યો. જેના પરિણામે આજે તે 200 મિલ્યન ડોલરનો માલિક બન્યો અને જો Tumblrની આવક જોડવામાં આવે તો 800 મિલ્યન ડોલરનો માલિક થાય છે આ 26 વર્ષનો યુવક.

જો કે ડેવિડે 17 વર્ષની ઉંમરે જ માતા-પિતાનું ઘર છોડીને એકલાં રહેવાનું પસંદ કર્યું હતું. જ્યારે 2011થી તે પોતાની ગર્લફ્રેન્ડ રચેલ એકલે સાથે રહે છે જે એક શેફ તેમ જ સાયકોલોજી ગ્રેજ્યુએટ છે.

અને ડેવિડના દિમાગમાં Tumblrનો જન્મ થયો

ડેવિડ Tumblr બનાવવા માટેના આઈડ્યા વિશે કહે છે કે મને હંમેશા એક પ્લેટફોર્મ જોઈતું હતું એટલે કે એક ઓનલાઈન આઈડેન્ટીટી જોઈતી હતી. જ્યાં હું મારી દરેક વસ્તુ, શોખ તેમ જ દિવસભરની બાબતો કહેવાનો અને બતાવવાનો મોકો મળે. બસ, આ બધા માટે જ્યારે હું ઇન્ટરનેટનો સહારો લેતો હતો ત્યારે બ્લોગ જ ફક્ત આ પ્લેટફોર્મ પૂરું પાડી શકતું હતું. પરંતુ વર્ડપ્રેસ, બ્લોગર અને ટાઈપ પેડ જેવી બ્લોગ પ્રોવાઈડર સાઈટમાં બ્લોગ પર કન્ટેન્ટ અપડેટ કરવા માટે ઘણી મહેનત અને લાંબી પ્રોસેસ કરવી પડતી હતી. જેથી મને કંઈક સરળ અને વધુ સારું કરવાનું સૂઝ્યું. આજે મારો સૌપ્રથમ બ્લોગ davidville.com (tumblr કન્સેપ્ટવાળો ડેવિડનો પર્સનલ બ્લોગ) પાંચ વર્ષ પછી પણ હું જાળવી શક્યો છું ત્યાં મારા બ્લોગર અને વર્ડપ્રેસના બ્લોગ મેં અઢી વર્ષમાં જ બંધ કરી દીધાં હતાં.

Tumblrને Yahooએ ખરીદ્યા પછીનું વાતાવરણ

  • એક સપ્તાહ પહેલાં જ ખરીદાયેલી આ વેબસાઈટની આ ડીલ પછી Tumblrના ઘણાં યુઝર્સે વેબસાઈટને છોડી દેવાની ધમકી આપી હતી. કારણકે યુઝર્સને લાગે છે કે યાહૂ હંમેશની જેમ Tumblrની સરળતા અને રિચ લૂકને પોતાની જેમ મચેડીને બગાડી નાંખશે તેમ જ રેવન્યુ કમાવવાના હેતુથી એડવર્ટાઈઝમેન્ટથી ભરી નાંખશે
  • Yahooએ જાહેરાત કરી છે કે અમે Tumblrને બગાડીશું નહીં તેમ જ તેના CEO તરીકે ડેવિડ કાર્પ જ ચાલુ રહેશે
  • ડીલ પાર પડ્યા બાદ કંપની સાથે અત્યાર સુધી લોયલ રહેવા બદલ Tumblr વેબસાઈટના કુલ 175ના સ્ટાફમાંથી પ્રથમ 10 કર્મચારીઓને મળશે એવરેજ 6.2 મિલ્યન ડોલર (આશરે રૂ.30 કરોડ) જ્યારે પ્રથમ 30ને 3.3 મિલ્યન ડોલર (આશરે રૂ.16 કરોડ) મળશે.

ડેવિડ તેની ગર્લફ્રેન્ડ રચેલ સાથે

Yahoo વિશે પણ થોડું જાણીએ

યાહુ (જેનું પહેલાં નામ ‘જેરીઝ ગાઈડ ટુ ધ વર્લ્ડ વાઈડ વેબ’ હતું જે બીજી વેબસાઈટની ડીરેક્ટરી હતી.)ની સ્થાપના જાન્યુઆરી ૧૯૯૪માં સ્ટેનફોર્ડ યુનિર્વિસટીના બે વિદ્યાર્થીઓ, જેરી યાંગ અને ડેવિડ ફિલોએ કરી હતી. “Yahoo” નામ મસ્તીમાં અમસ્તું જ રાખવામાં આવ્યું હશે તેવો ખ્યાલ આવે છે પરંતુ તેનું આખું નામ “Yet Another Hierarchical Officious Oracle”. છે. યાહુએ વેબ ડીરેક્ટરીઝમાંથી પોતાનું વેબ પોર્ટલ ચાલુ કરવાનું વિચારીને ૮ માર્ચ ૧૯૯૭ના રોજ “ફોર ૧૧” કંપનીની “રોકેટમેલ” નામની વેબમેલ ર્સિવસ ખરીદી જે “યાહુ મેલ” બની જેણે યાહુને ઈન્ટરનેટ જગતમાં નં.૧ ઉપર પહોંચાડી દીધી.

સૌ પ્રથમ યાહુએ ગુગલ સાથે કરાર કરી સર્ચ એન્જીનનું પેજ ચાલુ કરેલ જે ૧૮ ફેબ્રુઆરી ૨૦૦૪માં રદ કરી પોતાની ટેકનોલોજી દ્વારા લોન્ચ કર્યું. યાહૂની ચાહનાની વાત કરીએ તો વર્લ્ડમાં ચોથા નંબરની સૌથી લોકપ્રિય વેબસાઈટ છે જ્યારે ભારતમાં 5મા ક્રમે છે.

ઇન્ટરનેટ જગતની અત્યાર સુધીની ટોપ ટેન મોટી ડીલ

10. Yahooએ ખરીદી Overtue કંપની (Altavista) (વર્ષ 2003) – 1.63 અબજ ડોલર
આ કંપનીનું Altavista નામનું સર્ચ એન્જિન તેના જમાનામાં સારું એવું પોપ્યુલર હતું.

9. Googleએ ખરીદ્યું YouTube (વર્ષ 2006) – 1.65 અબજ ડોલર
યુઝર દ્વારા જનરેટ અને અપલોડ કરાતી ફક્ત એક વર્ષ જૂની વેબસાઈટ યૂટ્યુબને ગૂગલે ખરીદી લીધી.

8. eBayએ ખરીદ્યું Skype (વર્ષ 2005) – કિંમત 2.6 અબજ ડોલર
Skypeએ ઇન્ટરનેટ કોલ (VOIP) અને વિડીયો કોલિંગ માટે જાણીતી ઓનલાઈન સર્વિસ છે

7. Googleએ ખરીદ્યું DoubleClick (વર્ષ 2008) કિંમત 3.1 અબજ ડોલર
DoubleClick એ ઓનલાઈન એડવર્ટાઈઝમેન્ટ સર્વ કરનારી અગ્રણી કંપની હતી. ગૂગલે પોતાની એડ સર્વિંગ Adsense અને Adwords સર્વિસને વધુ મજબૂત બનાવવા આ પગલું ભર્યું હતું.

6. Ciscoએ ખરીદ્યું WebEx (વર્ષ 2007) કિંમત 3.2 અબજ ડોલર
WebEx ઓનલાઈન વેબ કોન્ફરન્સિંગ, ઓન-ડિમાન્ડ કોલોબરેશન, ઓનલાઈ મીટિંગ્સ અને વિડીયો કોન્ફરન્સની સર્વિસ પૂરી પાડે છે.

5. Yahooએ ખરીદ્યું GeoCities (વર્ષ 1999) કિંમત 3.6 અબજ ડોલર
GeoCities તે સમયે વિશ્વમાં સૌથી પોપ્યુલર વેબસાઈટ હતી જે યુઝર્સને પોતાના વેબપેજ બનાવવા તેમ જ હોસ્ટ કરવા માટે પ્લેટફોર્મ પૂરૂ પાડતી હતી. 2009માં યાહૂએ આ સેવા બંધ કરી દીધી.

4. AOLએ ખરીદ્યું Netscape (વર્ષ 1998) કિંમત 4.2 અબજ ડોલર
આજે જેમ ગૂગલ છે તેમ 90ના દાયકામાં AOL હતું. તેણે Netscape નામનું બ્રાઉઝર ખરીદીને માઈક્રોસોફ્ટના ઇન્ટરનેટ એક્સપ્લોરરને સારી લડત આપી હતી.

3. Yahooએ ખરીદ્યું Broadcast.com (વર્ષ 2001) કિંમત 5.7 અબજ ડોલર
Broadcast.com એક ઓનલાઈન રેડિયો બ્રોડકાસ્ટિંગ વેબસાઈટ હતી જેની ભારે લોકપ્રિયતાને પરિણામે યાહૂએ ખરીદી લીધી હતી.

2. Microsoftએ ખરીદ્યું aQuantive (વર્ષ 2007) કિંમત 6 અબજ ડોલર
માઈક્રોસોફ્ટે પોતાની એડવર્ટાઇઝિંગ સર્વિસને મજબૂજ કરવા ડિજીટલ માર્કેટિંગ નેટવર્ક કંપની aQuantiveને ખરીદી.

1. Oracleએ ખરીદ્યું PeopleSoft (વર્ષ 2004) કિંમત 10.3 અબજ ડોલર
PeopleSoft એ હ્યુમન રિસોર્સ પ્રોવાઈડ કરતી કંપની છે. જે કસ્ટમર રિલેશશીપ તેમ જ ચેઈન મેનેજમેન્ટ માટેના સોફ્ટવેર્સ પૂરી પાડે છે.

Published in Gujarati Midday (Mumbai) on 26th May 2013

Advertisements

2 thoughts on “Yahoo buys tumblr for 1.1$ billion : Why such a huge pay for tumblr??

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s